De Wormer Gesank besteet zënter 1850. De geneeë Grёnnungsdatum ass net bekannt, dofir ass awer gewosst, datt de Veräi fest Statuten an eng gutt geféiert Chronik zanter dem 10.4.1852 opzeweisen huet.
Deemools war d'Chorale e renge Männerchouer, deen am Jor 1950 säin 100. Anniversaire als solche konnt feieren. Ufanks de 60er Jore huet d'Zuel vun de Sänger ofgeholl. Ëmmer manner Männer konnten sech fir de Chouergesang begeeschteren , an dëst huet fir sämtlech Chéier aus der Ëmgéigend gegollt. Doraus ass eng Zesummenaarbecht a Form vu „Chorales Réunies Wormeldange - Ehnen ″ entstan: mat gemeinsame Prouwen an Optrëtter wéi z.b. vun 1961 un regelméisseg op der Place d' Armes an der Stad. D'fusionéiert Chéier goufe fir d'éischt vum Emil Zenner, dono zesumme mam Pierre Rech, geleet.
Wéi 10 Joer spéider op en Neits d'Sängerzuel gesonk ass, gouf d' Aféiere vun enger Chorale mixte an d'A gefaasst. De 27. September 1973 wor déi éischt offiziell Prouf vun der nei geschafener Chorale Mixte, déi Ufank 1974 hiren éischten Optrëtt hat.
Ënnert der Leedung vum Pierre Rech goufe Wonschconcert'en, thematesch oder spirituell Concert'en opgefouert. 1993 gouf den Dirigent Pierre Rech mat engem Gala-Concert fir seng 30- jähreg Tätegkeet geéiert.
1994 huet de Michel Ronkar d'Geschécker vun der Chorale iwwerholl. Ënnert him gouf déi Traditioun vu „Concert spirituel" a Concert mat engem speziellen Thema virugefouert, wéi z.B. „Schaff ahoi ! ", „Wormer Express", „Wormer am Sambaféiwer" , „Oper an Operett"...
Ganz besonnesch a gudder Erënnerung bleiwen déi schéi Bühnendekoratiounen, déi den Dirigent ëmmer selwer entworf an ausgefouert huet.
Am Joer 2005 gouf hien ofgeléist vum Thomas Rieff, engem Musiker aus Däitschland. Ënner sénger Leedung gouf, ënner anerem, den CD vun de "Musellidder" opgeholl.
Vu Mee 2009 bis Abrëll 2011 huet de Jean Gehlen d'Geschécker vun der Chorale geleet.
De John Rodenbour huet sech ugebueden, fir den Interim ze machen, an huet de Chouer während 7 Méint geleet, a bei all sengen offiziellen Optrëtter begleed.
Iván Boumans
Den 28. November 2011, huet e jonke Museker, den Iván Boumans (www.ivanboumans.com) d'Direktioun vun der Chorale iwwerholl. Vu September 2016 bis den 9. Juni 2018 huet d'Steffi Schlink dem Iván Boumans ënner d'Äerm gegraff, andems sie d'Leedung vum Chouer bei senge kierchlechen Optrëtter iwwerholl huet.
No dem Galaconcert "Goodbye, Ivan" den 9. Juni 2018, wou den Ivan Boumans säi läschten Optrëtt als Dirigent vun der Wormer Chorale hat, iwwerhëlt d'Steffi Schlink d'Direktioun vum Chouer.Vill Chance huet d'Chorale, datt si op den talentéierte Luc Rollinger als Organist a Pianist kann zréckgräifen.
Steffi Schlink
Der Chorale war et dacks gegënnt, am Radio oder op der Televisioun opzetrieden; hir Lidder goufen och op Cassette an esouguer op CD opgeholl.
Musikalesch Héichpunkter an Erliefnesser waren ouni Zweifel der Chorale hir Fréijoersconcert'en déi all Joer am Mee ënnert engem Thema ofgehale ginn, sou wéi déi 9 Concerts Spirituels, déi ëmmer vu renomméierte Musiken an Ensembele begleet goufen.
Dës Concert'en hunn ëmmer groussen Uklang beim Publikum fonnt, deen iwwer d' Qualitéit vun de Leeschtungen ëmsou méi beandrockt war, wann ee bedenkt, dass ëmmer nëmmen op Solisten aus dem eegene Chouer zréckgegraff gouf.
Der Chorale hir Gebuertsdeeg goufe regelméisseg gefeiert: 1975 den 125.,1985 den 135. an am Joer 2000 den 150. Anniversaire. Bei där Geleeënheet krut d'Chorale och en neie Fändel.
Ofschléissend bleift nach ze ernimmen, dass déi Wormer Sängerinnen a Sänger niewent Concert'en och de musikaleschen Encadrement vu feierleche Massen a kierchleche Feierlechkeete wéi Kanddafen, Hochzäiten a Begriefnesser an der Wormer Por iwwerhuelen.
Selbstverständlech gëtt och all Jor bei der Donatusprëssessioun op der Koeppchen a bei der Berrger Körmes gesong.
